Berichten met tag carnaval

Zoondag zien veer weer mèt de zaate herremenie in d’n optoch mètgelaope. Veer hadde gelökkig prachtig weer, sjoen blow loch! Veer zien um 2 oor bijein gekaome, en nao ‘t ierste pèlske höbbe veer us detösse gepeers. Nao d’n optoch zien veer nog get roondgetrokke, via ‘t Vriethof nao ‘t Slevrowweplein en oeteindelik via ‘t Pothuiske de Stokstraot in. Dao zien veer gebleve tot veer de piep leeg hadde. Good geammezeerd!!!

Maondag zien veer mèt z’n twiekes allein de stad in gegaange. Dao troffe veer de Clochards, en kraog Denise un medaalje. Naotot veer un pèlske mèt ze gedroonke hadde, zien veer get goon rondlaope vaan de Stokstraot naor ‘t Slevrowweplein, en vaan dao oet naor de Koojstraot en kaffee de Belsj. Bij de Belsj stoont de vastelaovesvierder vaan 2012 zien aw pleetsjes te dreijje. Later troffe veer bij ‘t Pothuiske get bekinde vaan us zaate herremenieke, en zien veer dao same mèt door de straote getrokke. Oeteindelik zien veer weer terök bij ‘t Pothuiske beland, um dao ‘t optreijje vaan Ziesjoem te beluustere.

Dinsdag Troffe veer us zaate herremenieke bij kaffe Lure, boe veer e heerlik ontbijt kraoge mèt koffie. Toen veer dat naor binne hadde gewerrek, en e pèlske, zien veer vertrokke riechting kaffee d’n “e Baog. Volgens euze breef vaan de Tempeleers moste veer dao zien, meh naotot veer gespäöld hadde, zag us d’n oetbater tot veer dao gaar neet zien moste, mèh bij kaffee D’n Awwe Stiene. Toch kraoge veer 111 punte, en un medaalje veur de veendel. Veer zien toen aoch mer goon speule bij de Awwe Stiene, en aoch dao weer 111 punte! Es lèste späölde veer bij kaffee Tijl Uilenspiegel veurtot veer de Vriethof op trokke veur ‘t Kongkoer. Nao 3 kerteer wachte koste veer de buun op, en alweer wiste veer d’n Ierste Pries mèt Lof vaan de jury in de wach te sleipe. Eve snel mèt de Hoege Hoeglöstigheid op de foto, en toen naor ‘t Theater um dao de traditionele gropsfoto te make. Bij de Perroen dronke veer us eine op eus succes, en vaan dao oet ginge veer weer langsem via kaffee Kläöske nao ‘t Pothuiske, en de aw brögk euver um eve te goon ete bij de Mangerie (Crowne Plaza). Dao kraoge veer heerlikke friet mèt zoervleis, en koste veer eve op aosem kaome, en alle kraom vaan us aof goeje. Nao ‘t ete zien veer nog mèt z’n twiekes de Stokstraot in gedooke, en dao troffe veer Camille en Inge vaan de Hermenie vaan Heugem, en höbbe veer us nog good vermaak mèt e springtow. Tege haaf 12 höbbe veer mèt pijn in eus veuj de bös naor hoes gepak, en koste veer us deneer legke. Vastelaovend 2013 waors weer manjefiek, en veer höbbe weer ins gebóf mèt ‘t weer!